Руското Министерство за надворешни работи ги повика Приштина, САД и ЕУ да престанат со провокациите и да ги почитуваат правата на Србите на Косово, изјави официјалната претставничка на руското МНР Марија Захарова.

Захарова истакна дека одлуката на властите од Приштина од 1 август да почнат да применуваат неразумни дискриминаторски правила за присилна размена на лични документи и регистарски броеви на локалните Срби, е само уште еден чекор кон протерување на српското население од Косово.

Таа истакна дека Москва ги повикува ЕУ, САД и Приштина да престанат со провокациите.

– Косовските лидери знаат дека Србите нема да останат рамнодушни кога станува збор за директен напад на нивните слободи и тие намерно одат на ескалација за да предизвикаат воено сценарио. Секако, цел на напад е и Белград, кој Западот сака дополнително да го „неутрализира“ со рацете на косовските Албанци – рече Захарова.

Ваквиот развој на настаните е уште еден доказ за неуспехот на посредничката мисија на ЕУ, нагласи Захарова.

Ова е и пример какво место е подготвено за Белград во Европската унија, нудејќи му на Белград де факто да го трпи недостатокот на правата на своите сонародници, рече претставничката на руското МНР.