Во земјотресот со јачина од 6,8 степени според Рихтеровата скала што денеска ја погоди кинеската провинција Сечуан, најсилниот на подрачјето од 2017 година, загинаа 46 лица, покажуваат најновите извештаи на ЦЦТВ.

Некои патишта и домови близу епицентарот се оштетени од лизгање на земјиште, додека комуникациите се во прекин најмалку во едно подрачје, информираше државна телевизија. Нема регистрирано штета на брани и хидроелектрани на 50 километри од епицентарот. Но, штетата на мрежата влијаеше на снабдувањето со електрична енергија за околу 40.000 корисници.

Епицентарот на земјотресот е во градот Лудинг, во планините, на околу 226 километри југозападно од главниот град на покраината Сечуан, Ченгду. Како што пренесуваат кинески медиуми, во Лудинг потресот бил толку јак, што на некои луѓе им било тешко да останат исправени. Пукнатини се појавиле во домови во областа.

На видеа на социјалните мрежи може да се видат како се лулаат светла, а луѓе од згради бегаат на улица. Според државната телевизија, вкупно 39.000 лица живеат во круг на 20 километри од епицентарот и 1,55 милиони во 100 километри. Најсилниот земјотрес во провинцијата Сечуан е евидентиран во мај 2008 година, со јачина од 8 степени. Притоа загинаа речиси 70.000 лица, а предизвиканата штета беше огромна.

Во меѓувреме, видеото снимено од безбедносна камера на кое се гледа внатрешноста на една градинка во моментот на земјотресот ги обиколува социјалните мрежи. Како што ќе видите, наставниците трчаат да ги заштитат децата и ги ставаат под клупите и масите.