Сè попопуларната апликација за кореспонденција, Telegram, воведува претплата. Тоа го потврди и нејзиниот автор Павел Дуров, кој откри и како ќе ја понуди претплатата до крајот на месецот. Како што напиша на својот канал Телеграм, претплатата ќе им понуди на оние кои се подготвени да платат, „премиум искуство“ без „негативни промени за постоечките корисници кои бесплатно ја користат апликацијата“.

Според Дуров, корисниците кои не плаќаат за користење на Telegram ќе можат да ги искористат предностите на некои аспекти што ќе им бидат понудени на премиум претплатниците. Меѓу другото, се споменува преглед на особено големи документи, мултимедија и фотографии кои им ги испраќаат „премиум корисници“.

Како што појасни, воведувањето претплата всушност е одговор на барањата на корисниците за дополнителен простор за складирање и протокот на информации, без да се уништат бесплатните услуги што ги нудат на другите корисници.

„По долго размислување, заклучивме дека единствениот начин да им обезбедиме на нашите најпребирливи клиенти повеќе, а притоа да ги задржиме постоечките опции бесплатни, е да понудиме „повеќе“ за одреден надомест“, напиша Дуров.

Иако не објасни што точно ќе добијат претплатниците, ниту колку ќе ги чини, во јавноста се појавија информации кои доаѓаат од бета-тестерот. Така, наводно „премиум корисниците“ треба да имаат поголема брзина на преземање, конверзија од глас во текст, дополнителни опции за управување со разговорот, но и искуство за користење на апликацијата без реклами. Исто така, се споменува и цена од 4,99 долари месечно, но таа може да варира низ светот.

Не е јасно дали Дуров сака да собере пари со претплата за да ја финансира понатамошната работа и развој на Telegram или да заработи нешто. Со воведување претплата, тој сигурно ќе обезбеди некој редовен извор на приход што би можел да му помогне да го одржи жив Telegram. Минатата година, апликацијата зеде заем од 1 милијарда американски долари за да плати за одржување на серверот, а претходно изјави дека „верува дека Telegram треба да биде финансиран првенствено од корисниците, а не од огласувачите“.