Илон Маск, ко-основачот на Apple Сив Вознијак и 1.000 други експерти од технолошката индустрија во отворено писмо ги повикаа технолошките компании да го прекинат „експериментот со вештачка интелигенција, за да не се доведе целиот свет во опасност“.

„Компаниите треба да ја прекинат работата на развојот на вештачката интелигенција во следните шест месеци. Доколку не го сторат тоа, ги повикуваме владите на земјите да интервенираат“.

Тоа е заклучокот од отвореното писмо потпишано од голем број луѓе од висок профил, вклучително и академици од областа на напредните технологии.

„Во последните неколку месеци забележавме дека компаниите се натпреваруваат да бидат првите што ќе создадат вештачка интелигенција од следната генерација. Проблемот е што никој, дури ни креаторите, не може да ги разбере, предвиди и веродостојно да ги контролира овие дигитални умови“, се наведува во писмото.

Во писмото, објавено од Институтот Future of Life, се бара суспензија додека независни експерти не развијат, имплементираат и прегледаат заеднички безбедносни протоколи за такви откритија.

„Моќните системи за вештачка интелигенција треба да се развиваат само кога ќе бидеме убедени дека нивните ефекти ќе бидат позитивни и дека нивните ризици можат да се менаџираат“, се наведува во писмото.

Писмото доаѓа откако Европол, по истрагата како криминалците можат да ги злоупотребуваат големите јазични модели (LLM), како што е ChatGPT, во понеделникот предупреди за потенцијалната злоупотреба на овој систем преку три области на криминални активности кои предизвикуваат најголема загриженост, „фишинг“, односно „ фишинг“, ширење дезинформации и сајбер криминал.

Маск, чија компанија Тесла користи вештачка интелигенција за системот за автопилот во возилата, претходно ја изрази својата загриженост за развојот на вештачката интелигенција.