Пониските жени ќе можат да се приклучат на шпанската полиција, откако највисокиот суд во земјата денеска пресуди дека минималната висина за жените кои сакаат да се приклучат на полициските сили е дискриминаторска.

Судот го укина условот дека жените мора да бидат високи најмалку 1,60 метри во пресудата за случајот што го покрена млада жена на која и беше забрането да полага тестови во 2017 година, бидејќи била четири сантиметри пониска од потребниот минимум, објави Ројтерс.

Барањето „претставува индиректна дискриминација на жените во споредба со мажите чија потребна висина (1,65 метри) е многу помалку барана, бидејќи процентот на жени (во Шпанија) под тоа ниво (25 проценти) е многу поголем од процентот на мажи (три проценти )“, се наведува во судскиот документ.

Под услов подносителката на тужбата да ги положи испитите, судот и наредил на полицијата да ја вработи и да ѝ го признае стажот како и на жените кои биле примени во полиција во 2017 година.

Според едно светско истражување спроведено од Империал колеџ во Лондон, просечната висина на 19-годишните Шпанци во 2019 година била 1,76 метри, додека жените на иста возраст биле во просек високи 1,62 метри.

Кога станува збор за висината, Шпанците се рангирани на 58 место од 200 земји и територии, додека жените се на 77 место.

Судот изјави дека националната полиција не обезбедила оправдување за ограничување на пристапот на барателите на работа врз основа на нивната висина.