Институтот за судска медицина и криминалистика денес излезе со соопштение во врска со починатото машко лице кое беше најдено на местото викано Ораш општина Ново Село. Во реакцијата која е потпишана од директорот на Институтот за судска медицина, д-р Александар Станков се вели дека обдукцијата врз телото на момчето е направена по највисоки светски стандарди, а се упатуваат критики до ОЈО и оние кој го прегледале телото. За нив се вели дека немаат елементарни познавања од судска медицина, иако се работи за познавања кој треба да ги има секој обвинител за да може да работи на случаи од ваков тип и познавања кој треба да ги има секој лекар за да може да изврши преглед на мртво тело, како и дека Обвинителството нема доверба во Институтот за судска медицина.

„По пронаоѓање на телото на ден 07.06.2022 година околу 19.00 часот бил извршен увид на местото на настанот од страна на службени полициски лица и јавен обвинител од ОЈО Струмица. При увидот телото било прегледано од страна на лекар мртвопроверител. По наредба на јавниот обвинител истата вечер телото е донесено на Институтот за судска медицина, криминалистика и медицинска деонтологија за извршување на судско медицинска обдукција. На 08.06.2022 година во претпладневните часови на Институтот за судска медицина, криминалистика и медицинска деонтологија извршена е судскомедицинска обдукција врз телото на пронајденото починато лице. Обдукцијата е направена по сите светски стандарди од двајца специјалисти по судска медицина. За време на обдукцијата беше земен биолошки материјал за извршување на токсиколошки анализи и изолација на ДНА профил”, се вели во соопштението од д-р Станков.

Тој појаснува дека при соопштување на првичните резултати од за нив непознати причини јавниот обвинител наредил да се задржи телото на Институтот за да потоа без никакви консултации со нив нареди да се направи реобдукција од три вешти лица.

„На 10.06.2022 година направена е реобдукција од тројца специјалисти по судска медицина. Резултатите од обдукцијата и реобдукцијата се идентични односно нема никакви спротиставени мислења на вештите лица. Оваа одлука на Обвинителството веројатно се темели на недовербата кон нашата Институција и вербата во погрешните информации добиени од страна на мртвопроверителот односно непрофесионалниот изведен заклучок за причината и начинот на смртта формиран врз основа на надворешен преглед. И двајцата не се едуцирани ниту пак имаат знаење да толкуваат повреди и промени особено кога се работи за тело кај кое постојат развиени трулежни промени. Причината наведена во наредбата за реобдукција (неутврдена причина за смрт веднаш по завршување на обдукцијата) покажува дека ОЈО и колегите кој го прегледале телото немаат елементарни познавања од судска медицина, познавања кој треба да ги има секој обвинител за да може да работи на случаи од ваков тип и познавања кој треба да ги има секој лекар за да може да изврши преглед на мртво тело. Особено не ни е јасно како може истата вечер да излезат информации во јавноста дека се работи за убиство пред воопшто да биде започната обдукцијата”, се додава во писмената реакција.

– Според досегашните информации, првата обдукција не покажала знаци на насилна смрт, односно дека насилство не било причина за смртта.

Како потсетување за оние кои не знаат, причина за смрт претставува онаа основна повреда или болест која го иницирала ланецот на промени кои завршуваат со смрт.

Во најголем број на случаи причината за смрт се одредува веднаш по завршување на обдукцијата.

„Во одреден број случаи потребни се дополнителни испитувања и анализи кои ќе помогнат во донесување на заклучокот за причината за смрт. Тие анализи може да потраат подолго време. Затоа обвинителството треба да биде во постојана комуникација со лекарите од Институтот кои се единствени меродавни во давање на причина за смрт и толкување на промени на тело особено кај тела кои се со развиени трулежни промени. Кога ќе се дојде до причината за смрт тогаш обвинителството врз основа на сите собрани информации донесува одлука за начинот за смрт, односно ако се работи за насилна смрт дали е убиство, самоубиство или несреќен случај. Во конкретниот случај врз основа на погрешно толкување на промени на телото од покојниот донесен е преран заклучок во врска со начинот за смрт пред воопшто да се добијат информации од наодот од обдукцијата било за причината за смрт или пак токсиколошките наоди”, дообјаснува д-р Станков.

На Институтот за судска медицина во тек се токсиколошките испитувања на земениот биолошки материјал.

Штом се добијат резултатите од токсиколошките испитувања надлежниот обвинител ќе биде известен за причината за смрт.