Двајца туристи, кои вчера исчезнаа на Јадранот во делот на Хрватска, се безбедни и се во Вели Лошињ, пишува Јадрански.

Станува збор за двајца германски државјани, татко и син по кои вчера се трагаше на море. Нивниот катамаран на надувување бил оштетен поради силниот ветер, па таткото и синот пливале по морето. За среќа, тие носеле костими за нуркање.

Потрагата по туристите, во која покрај поморската полиција учествуваа и Капетанијата на пристаништето и училишниот брод на Министерството за море, транспорт и инфраструктура, беше започната вчера попладне по двајцата германски државјани кои со катамаран испловија од заливот Јакишница во Паг, а бурата ги однела до островот Трстеник.

Околу 17.30 часот, екипажот на полициски брод пронашол катамаран и 59-годишен германски државјанин меѓу островите Оруда и Вели Лошињ.

Откако го одвлекле спасениот германски државјанин заедно со катамаранот до брегот, продолжиле со потрагата по споменатиот млад човек, пловејќи во правец на островот Трстеник.

Синоќа околу 00.40 часот, младиот човек чија потрага била прекината вечерта, лично се обратил до полицијата во Лошињ облечен во нуркачки костим со појас за спасување и гребло, откако успеал да доплива до брегот во областа Мали Лошињ.

Иако со ова успешно е завршена потрагата на море, а споменатите германски државјани не се повредени, поморската полиција уште еднаш апелира до граѓаните и туристите да не се впуштаат во ризични, потенцијално опасни ситуации, особено во случај на силен ветер и неповолни временски услови поради кои може да се промени ситуацијата на море.