Министерот за образование и наука Јетон Шаќири при денешната посета на неколку струшки училишта повтори дека останува на ставот настава со физичко присуство да има во текот на целата учебна година поради придобивките од тоа.

Покрај претпоставките во јавноста дека во зимските месеци наставата ќе се одвива он лајн или ќе има продолжен зимски распуст со цел штедење на електрична енергија, ресорниот министер нагласи дека на состаноците со релевантните институции ќе посочи оти и образованието треба да е приоритет како здравството и некои други сектори.

– Стојам на ставот физичка настава да има целосно. На состаноците со институциите ќе зборуваме приоритет да биде и образованието како што е здравството и другите сектори, изјави Шаќири, одговарајќи на новинарско прашање за мерките за штедење на електрична енергија во училиштата.

За следната недела најави состанок со министрите за економија, финансии и другите инволвирани ресори во делот на енергетиката нанкој треба да се разговара токму з аоваа проблематика.

– Ќе дискутираме за оваа проблематика за да можеме најдобро да ја изменаџираме. МОН ги извади сите податоци за сите основни и средни училишта колку користат електрична енергија и во комуникација со директорите ќе бараме начин што подобро да се изменаџира електричната енергија, рече Шаќири.

При денешната посета на неколку струшки училишта посочи дека во разговор со директорите побарал да се исклучат светилките и да се користи природната светлина.

Директорката на гиманзијата „Ибрахим Темо“ Бесиме Јонузи рече дека се подготвени за претстојната зима и оти имаат финансиски средства за електрична енергија и нафта за греење.

– По ребалансот на општинскиот буџетот имаме пренамена за дополнителни средтсва за електрична енергија и нафта за греење и секако дека ќе бидеме дел од соработката со МОН за менаџирање на состојбата со енергетската криза, изјави Јонузи.