Во ќелијата денеска се обидел да се самоубие Владимир К., таткото на малолетниот масовен убиец Коста К.(13) кој уби девет лица во ОУ „Владислав Рибникар“ во Белград, објави попладнево српски Информер. Како што ексклузивно дознава, тој во притворот на Окружниот затвор се залетал со сета сила и се удрил со главата во ѕид.

Владимир итно бил префрлен од стражарите во затворската болница лоцирана во Централниот затвор на улицата Бачванска во Белград. На Владимир му е укажана лекарска помош и неговиот живот не е во животна опасност. Добро упатен извор на Информер.рс вели дека Владимир по апсењето бил сместен во приемното одделение на Окружниот затвор во Белград.

– Во приемното одделение може да престојува до 30 дена. До моментот на обидот за самоубиство тој го почитувал куќниот ред, не предизвикувал инциденти, но јасно било дека тешко се справува со целата ситуација, поради што земал лекови за смирување по потреба. Лошо комуницирал со цимерите и чуварите. Бидејќи истрагата е во тек, тој нема право на семејни посети и може да се види само со адвокат – објаснува соговорникот, додавајќи:

– Владимир вчера психички пукна и се обиде да се самоубие, на тој начин што ненадејно се залета во ѕид и удри со глава пред својот цимер. Стражарите веднаш реагирале и Владимир добил соодветна лекарска помош.

Таткото на Коста, инаку, се товари за тешко кривично дело против општата безбедност, бидејќи неговиот син кобното утро на 3 мај зел два пиштоли на татко му од семејниот сеф и со нив ги убил учениците и обезбедувачот. Владимир, кој е угледен радиолог, беше сослушан на 5 мај во Вишото обвинителство во Белград и во таа прилика беше многу вознемирен и потресен од грозоморниот масакр што го изврши неговиот син.

Што се однесува до мајката и сестрата на Коста, веднаш по масакрот, двете од страв го напуштиле семејниот стан во Врачар и се засолниле на непозната локација. Помладата сестра на Коста, која исто како него учела во основното училиште „Владислав Рибникар“ и одела во четврто одделение, очигледно нема да остане во тоа училиште.

Како што утврдила истрагата, Коста од сефот зел два пиштоли на татко му, за кои ја знаел шифрата и направил четири молотови коктели, кои ги ставил во ранецот и тргнал во крвавиот пир. На влезот во училиштето го убил чуварот Драган Влаховиќ и уште три девојчиња кои случајно се нашле на влезот. Потоа ја заменил рамката од муниција во пиштолот во ходникот и влегол во училницата на приземјето, каде класот 7/2 на Коста имал час по историја. Таму прво ја ранил наставничката Татјана Стевановиќ во раката и стомакот, а потоа се свртел и пукал во децата. Убил пет деца, а ранил уште шест, по што се предал велејќи дека ги убил децата „затоа што е психопат“.

Инаку, Владимир е уапсен само неколку часа откако неговиот син извршил невиден масакр, пукајќи од оружјето на татко му, а Коста веднаш по злосторството завршил во психијатриска болница, бидејќи се уште нема 14 години и е кривично неодговорен.