Во Белград, но и во целиот регион, крвавиот масакр што го изврши 13-годишното момче Коста К.(13) во училиштето во Врачар и натаму е главна тема. Во зградата во Врачар каде живее семејството на Коста, станарите немо ја отвораат влезната врата. Сите се шокирани и потресени од тоа што го направил нивниот малолетен сосед.

На третиот кат, каде што живее семејството на момчето убиец, забележано е дека некој со нож или некој друг остар предмет низ целата врата од нивниот стан има издлабено заканувачка порака: „Коста, пи…, те чекаме!!!”

Забраната на платформите како „Тик-ток“ или емитувањето на реалити-шоуа, за српскиот претседател Александар Вучиќ не се решение на проблемот за спречување на идни масакри или булинг. Вучиќ во интервју за „РТС“, посочи дека детето-убиец Коста Кечмановиќ кое усмрти осум соученици и чувар во ОУ „Владислав Рибникар“, гледал видео на „Јутуб“, кое содржински, според него, е пресликано при масакрот.

„Не е во прашање само ‘Тик-ток’. Каква е разликата помеѓу ‘Јутуб’ и ‘Тик-ток’? Она што ќе го видите е на ‘Јутуб’, видео направено како спот, видео игрица. Ќе видите, во нашата земја е направено. Детето (Коста К.) тоа го прател. Ќе видите, неверојатно е. Како со индиго е пресликано со она што го направи. И сега да ги обвиниме децата кои го направиле видеото дека се виновни за тоа што се случи? Неодговорно е тоа што го направиле, но за да докажете дека тие влијаеле е само преку директна поврзаност дека токму тоа видео влијаело за да убиецот го направи масакрот – тоа е невозможно, секако“, рече Вучиќ.

Тој рече дека е спремен да се разговара на ова прашање, иако во забрана на платформи или формати на емисии – не гледа решение.

„Ние не сме тука да се грижиме за фотелјите. Децата мора да идат во училиште, мора да живееме слободно, да работиме. Кога ќе ги видам пораките од било кој од полицијата – страв ме фаќа. Психопати и монструми има. Ние ќе дадеме се од себе и ќе се бориме, верувам дека ќе живееме нормално, а ова никогаш нема да го заборавиме“, додаде Вучиќ.

Тој говореше и за мерките, па рече: „Нема гаранција дека тоа нема да се случи во иднина, носиме строги мерки“.