Анестезиологот од клиниката „Санте плус“ доби четири години затвор за смртта на родилката Дебора Ќерими-Џамбази, која во 2018 година почина при породување. Пресудата ја изрече судијата Марин Станевски, кој исто така досуди и забрана за вршење лекарска дејност во траење од четири години. Обвинението го застапуваше скопското Обвинителство, а го поднесе пред три години.

Анестезиологот беше обвинет за кривично дело тешки дела против здравјето на луѓето. Според обвинителот, тој применил неподобен начин на лекување и со тоа предизвикал смрт. Обвинителството тврдеше, а пред судот докажуваше, дека анестезиологот склучил договор да ја врши работната обврска, без потрбно работно искуство во специјалноста над две години.

„На овој начин тој му се приклучил на оперативниот тим, во кој биле двајца лекари специјалисти гинеколози, кои на 18.1.2018 година вршеле хируршки зафат – царски рез врз сега веќе починатата родилка. Обвинетиот почнал со воведување на пациентката во општа анестезија, но ендотрахеалниот тубус, наместо во дишните патишта, првично го поставил во луменот на хранопроводот, што предизвикало недостиг на кислород во организмот од тежок степен и трајни оштетувања на витално важни органи. Од тие причини кај родилката настапил смртен исход, а кај нејзиното новороденче биле предизвикани трајни и значителни оштетувања на мозочното ткиво“, стоеше во обвинението.

Сега право на жалба има скопското Обвинителство, како и првостепено осудениот.