Смртта на еден од најдобрите нокаутери во историјата на ММА, Ентони Рамбле Џонсон, го потресе боречкиот свет. Рамбле почина на 39-годишна возраст.

Американскиот борец двапати се бореше за титулата шампион на УФЦ во полутешка категорија, во која забележа шест победи и два порази. Неговата последна борба беше минатата година во Белатор кога го победи Хозе Аугусто Барос со нокаут во втората рунда.

Џонсон беше еден од најдобрите и најпопуларните борци во светот. Пред повеќе од една година тој јавно откри дека се бори со опасна болест. Но, надежта на навивачите на ММА ја подигна неговата објава на социјалните мрежи во мај кога напиша дека се враќа на тренинзите.

Во тој момент се чинеше дека Рамбле ја доби таа борба, но за жал болеста се врати во уште поагресивна форма.

Сега е откриено за што се работи. Џонсон почина од откажување на повеќе органи предизвикано од не-Хочкинов лимфом и хемофагоцитна лимфохистиоцитоза.

Не-Хочкиновите лимфоми се група на поврзани видови на рак кои се појавуваат во лимфниот систем и обично се шират низ телото.

Во случај на враќање на болеста, тоа се случува во многу поагресивна форма. Во текот на кариерата, Рамбле имаше 23 победи и шест порази.

Ќе го паметиме по победите против Андреј Арловски, Фил Дејвис, Рајан Бадер, Гловер Тешеира, Александар Густафсон…